قومی اسمبلی میں خیبرپختونخوا میں ایمرجنسی کی توثیق کیلئے قرارداد پیش

قومی اسمبلی میں خیبرپختونخوا میں نافذ کیے گئے گورنر راج اور ایمرجنسی کی آئینی توثیق کے لیے حکومت کی جانب سے وفاقی وزیر پارلیمانی امور طارق فضل چوہدری نے قرارداد پیش کر دی، جس سے قبل اپوزیشن کی مخالفت کے باوجود وقفہ سوالات معطل کیا گیا۔ اسپیکر سردار ایاز صادق کی زیرِ صدارت ہونے والے اجلاس میں اظہارِ خیال کرتے ہوئے وفاقی وزیر قانون اعظم نذیر تارڑ نے ایمرجنسی کو آئین کے عین مطابق قرار دیا اور بتایا کہ کے پی میں 2021 سے اب تک ہزاروں دہشت گردانہ واقعات پیش آ چکے ہیں۔ ان کا کہنا تھا کہ صوبائی حکومت کا غیر ذمہ دارانہ رویہ اور سیکیورٹی پر توجہ دینے کے بجائے دارالحکومت پر چڑھائی کے اعلانات ملکی سلامتی کے لیے خطرناک تھے، لہٰذا ریاست کی بقا اور امن کے قیام کے لیے یہ غیر معمولی اور ناگزیر فیصلہ کیا گیا۔