سعودی ہوائی اڈوں پر حملوں کے باعث پاکستانی پروازیں متاثر، 114 منسوخ

سعودی عرب کے ہوائی اڈوں پر حوثی ملیشیا کے حملوں اور فضائی آپریشن محدود ہونے کے باعث پاکستان اور سعودی عرب کے درمیان فضائی رابطہ کاری شدید متاثر ہوئی ہے۔ ایوی ایشن ذرائع کے مطابق گزشتہ 24 گھنٹوں کے دوران ملک بھر میں مجموعی طور پر 114 پروازیں منسوخ یا غیر فعال ہوئیں جبکہ 77 پروازیں تاخیر کا شکار رہیں۔ ریاض ایئرپورٹ 17 اکتوبر کی رات 12 بجے تک بند رہنے کے باعث آج بھی پاکستان سے ریاض کی 28 پروازیں منسوخ کی گئی ہیں، جبکہ پی آئی اے کی ملتان سے ریاض جانے والی پرواز کو متبادل ایئرپورٹ کی طرف موڑ دیا گیا ہے۔ اس کے علاوہ کراچی، لاہور، سیالکوٹ اور ملتان سے جدہ، دمام اور مدینہ جانے والی پروازیں بھی منسوخ یا گھنٹوں تاخیر کا شکار ہوئی ہیں، جس سے مسافروں کو شدید مشکلات کا سامنا ہے۔