کوئٹہ کے بلوچ ٹریننگ ونگ میں بیسک ملٹری ٹریننگ 22 کی پاسنگ آؤٹ پریڈ

کوئٹہ کے بلوچ ٹریننگ ونگ میں بیسک ملٹری ٹریننگ 22 کی ایک پروقار اور شاندار پاسنگ آؤٹ پریڈ کی تقریب کا انعقاد کیا گیا، جس میں نئے کیڈٹس نے بھرپور جوش و جذبے کا مظاہرہ کیا۔

تربیتی کورس کامیابی سے مکمل کرنے والے 173 نوجوان باضابطہ طور پر پاک فوج کی صفوں میں شامل ہو گئے ہیں۔ جنرل آفیسر کمانڈنگ (GOC) کوئٹہ نے تقریب میں بطور مہمانِ خصوصی شرکت کی اور پاسنگ آؤٹ پریڈ کا معائنہ کیا۔ مہمانِ خصوصی نے دورانِ تربیت شاندار صلاحیتیں اور اعلیٰ کارکردگی دکھانے والے جوانوں میں انعامات اور اسناد تقسیم کیں۔ تقریب میں تربیت مکمل کرنے والے جوانوں کے اہلِ خانہ، عسکری حکام اور شہریوں کی بڑی تعداد نے شرکت کی اور جوانوں کاپُرتبہ استقبال کیا۔

پاسنگ آؤٹ تقریب کے دوران نئے شامل ہونے والے جوانوں نے مادرِ وطن کے دفاع، سلامتی اور ارضی حدود کے تحفظ کے لیے ہر قسم کی قربانی دینے کا غیر متزلزل عزم ظاہر کیا۔ بلوچستان سے تعلق رکھنے والے نوجوانوں کا کہنا تھا کہ پاک فوج میں بطور سپاہی شمولیت اور مشکل ترین تربیت کی کامیابی سے تکمیل ان کے لیے دلی مسرت کا باعث ہے، اور وہ اپنے ملک کے دفاع کے لیے شوق اور جذبے سے پاک فوج کا حصہ بنے ہیں