حکومت نے مذاکرات کی ہر ممکن کوشش کی لیکن تحریک انصاف نے سیاسی خود کش حملہ کیا: بلاول بھٹو

قومی اسمبلی کے اجلاس سے خطاب کرتے ہوئے چیئرمین پیپلز پارٹی بلاول بھٹو زرداری نے کہا ہے کہ خیبرپختونخوا میں ایمرجنسی کا نفاذ مجبوری کے تحت کیا گیا اور حکومت نے حالات اس نہج پر پہنچنے سے بچانے کے لیے ہر ممکن سیاسی کوشش کی تھی۔ انہوں نے انکشاف کیا کہ مذاکرات کامیاب ہونے کے قریب تھے اور پی پی کے دو نمائندے اس کمیٹی میں شامل تھے، تاہم تحریک انصاف کی صوبائی قیادت نے خود ایک ’سیاسی خود کش حملہ‘ کرتے ہوئے تعاون سے انکار کیا۔ بلاول بھٹو نے الزام عائد کیا کہ کے پی میں خون کی ہولی کھیلنے والوں کو بھارت کی پشت پناہی حاصل ہے اور صوبے کا وزیر اعلیٰ ملک کے لیے لڑنے سے انکار کر رہا ہے۔ انہوں نے اپوزیشن کو دعوت دی کہ وہ دہشت گردی کے خلاف قومی لائحہ عمل اور پارلیمانی کمیٹی کا حصہ بنے تاکہ ملک کو اس ناسور سے پاک کیا جا سکے۔