کے پی حکومت سیکیورٹی چیلنجز پر چڑھائی کو ترجیح دیتی رہی، قیدی رہنما کا ریلیف عدالتوں کا اختیار ہے: اعظم نذیر تارڑ

وفاقی وزیرِ قانون و انصاف سینیٹر اعظم نذیر تارڑ نے قومی اسمبلی میں خطاب کرتے ہوئے کہا ہے کہ آئینی تقاضوں کے مطابق ایمرجنسی کے نفاذ کا ڈیکلریشن پارلیمنٹ کے دونوں ایوانوں میں پیش کرنا لازمی ہوتا ہے، جو حکومت نے آئین کے دائرے میں رہ کر کیا۔ انہوں نے بتایا کہ صوبے میں اندرونی خلفشار، سرحد پار دراندازی اور بڑھتی دہشت گردی ملکی سلامتی کے لیے خطرناک شکل اختیار کر چکی تھی، جبکہ کے پی حکومت اور وزیراعلیٰ عوام و فورسز کی قربانیوں کو نظرانداز کر کے دارالحکومت پر چڑھائی اور اپنی سیاست پر توجہ مرکوز کیے ہوئے تھے۔ وزیرِ قانون نے انکشاف کیا کہ صدرِ مملکت کی ہدایت پر دو روز تک حکومت اور اپوزیشن کی مذاکراتی کمیٹیوں میں مسودات کا تبادلہ ہوا، تاہم جب بھی دہشت گردی کا خاتمہ اور سیکیورٹی اہم نکتہ بنتا تو اپوزیشن کی جانب سے قید میں بند اپنے لیڈر کے لیے مراعات اور رہائی کی شرط رکھی جاتی۔ انہوں نے واضح کیا کہ کسی بھی قیدی کو قانونی ریلیف دینا صرف عدالتوں کا اختیار ہے، ایگزیکٹو کا نہیں۔