وزیر اعلیٰ پنجاب نے لائیو سٹاک کارڈ فیز 2 کا افتتاح کر دیا

وزیراعلیٰ پنجاب مریم نواز نے صوبے کے مال مویشی پالنے والے کسانوں کی اقتصادی بہتری کے لیے ‘لائیو سٹاک کارڈ فیز 2’ کا باضابطہ افتتاح کر دیا ہے۔ افتتاحی تقریب کے موقع پر بریفنگ میں بتایا گیا کہ پہلے مرحلے کے تحت دیے گئے قرضوں کی واپسی کی شرح 96 فیصد رہی، جس کے بعد اب فیز 2 کے تحت فارمرز کو 16 ارب 20 کروڑ روپے کے بلاسود قرضے فراہم کیے جائیں گے جن میں فی مویشی 27 ہزار روپے دیے جائیں گے۔ کسانوں کی سہولت کے لیے قرض کی رقم کا 25 فیصد حصہ اے ٹی ایم کے ذریعے نقد حاصل کرنے کی رعایت بھی دی گئی ہے۔ حکام کے مطابق سعودی عرب، چین، آذربائیجان اور یورپی یونین کے ساتھ گوشت کی برآمدات کے معاہدوں کے باعث ایک سال کے دوران پنجاب کی گوشت برآمدات میں 9 کروڑ 60 لاکھ ڈالرز کا نمایاں اضافہ ریکارڈ کیا گیا ہے۔