حکومت مخالف تحریک، جے یو آئی کل ملتان میں کانفرنس کرے گی

جمعیت علمائے اسلام (جے یو آئی) کی حکومت مخالف تحریک کے سلسلے میں کل ملتان میں ’مفتی محمود کانفرنس‘ منعقد کی جائے گی، جس سے جے یو آئی کے سربراہ مولانا فضل الرحمان خطاب کریں گے اور احتجاجی تحریک کے اگلے مرحلے کا باضابطہ اعلان کریں گے۔ پارٹی ترجمان اسلم غوری کے مطابق مولانا فضل الرحمان اور دیگر مرکزی رہنما کانفرنس میں شرکت کے لیے ملتان پہنچ رہے ہیں، جبکہ تمام تیاریاں مکمل کر لی گئی ہیں۔ ترجمان کا کہنا ہے کہ یہ کانفرنس مہنگائی، بے روزگاری، آئین کے تحفظ، مدارس کے مسائل اور بدامنی کے خلاف عوامی رابطہ مہم کا حصہ ہے اور اس کے انعقاد میں کسی قسم کی رکاوٹ برداشت نہیں کی جائے گی۔ جے یو آئی کے مطابق یہ اجتماع جنوبی پنجاب کی سیاسی سمت کا تعین کرنے اور عوام کے حقوق کے تحفظ میں اہم سنگ میل ثابت ہوگا۔