پاکستان میں ساؤتھ ایشین گیمز کے شیڈول کی منظوری دے دی گئی

ساؤتھ ایشیا اولمپک کونسل کی ایگزیکٹو کمیٹی نے پاکستان میں ساؤتھ ایشین گیمز (سیف گیمز) کے شیڈول کی باقاعدہ منظوری دے دی ہے، جس کے تحت یہ میگا ایونٹ آئندہ برس 3 سے 11 اپریل تک منعقد ہوگا۔ یہ مقابلے اسلام آباد، لاہور اور پشاور میں کھیلے جائیں گے جن میں 28 مردوں اور 25 خواتین کے کھیلوں کے مقابلوں کا انعقاد کیا جائے گا۔ اس ایونٹ میں رکن ممالک کے 4 ہزار 200 سے زائد ایتھلیٹس اور آفیشلز شرکت کریں گے اور کھلاڑی 346 گولڈ میڈلز کے لیے میدان میں اتریں گے۔ صدر پاکستان اولمپک ایسوسی ایشن عارف سعید نے بتایا کہ پاکستان ان گیمز کی شاندار میزبانی کے لیے مکمل تیار ہے اور حکومت کی جانب سے اس ایونٹ کو یادگار بنانے کے لیے بھرپور تعاون فراہم کیا جا رہا ہے۔