صدر پاکستان فٹبال فیڈریشن کی سعودیہ میں پاکستانی سفیر سے ملاقات، فٹبال کے فروغ پر تبادلہ خیال

پاکستان فٹبال فیڈریشن (PFF) کے صدر محسن گیلانی نے سعودی عرب میں متعین پاکستانی سفیر احمد فاروق سے ایک اہم ملاقات کی ہے، جس میں ملک میں فٹبال کے فروغ، گراس روٹ لیول کے ترقیاتی منصوبوں اور پاک-سعودی کھیلوں کے شعبے میں باہمی تعاون کو مستحکم کرنے پر تفصیلی تبادلہ خیال کیا گیا۔

ملاقات کے دوران پی ایف ایف کے صدر نے سفیر کو گراس روٹس اور قومی سطح پر جاری فٹبال کے منصوبوں سے آگاہ کیا اور سعودی عرب کے کھیل کے اداروں کے ساتھ روابط بڑھا کر پاکستان کے فٹبال ایکو سسٹم کو مضبوط بنانے کی ضرورت پر زور دیا۔ سفیر احمد فاروق نے فیڈریشن کی کاوشوں کو سراہتے ہوئے دونوں برادر ممالک کے درمیان کھیلوں کے میدان میں ہر ممکن تعاون کا یقین دلایا اور اس عزم کا اعادہ کیا کہ فٹبال دونوں ممالک کے عوام اور دیرینہ تعلقات کو مزید قریب لانے کا ایک بہترین ذریعہ ثابت ہوگا۔