بلوچستان : ایک ارب روپے سے زائد مالیت کی منشیات اور اسمگل شدہ سامان برآمد

بلوچستان میں کسٹمز کی بڑی کارروائی ایک ارب روپے سے زائد مالیت کی منشیات اور اسمگل شدہ سامان برآمد کرلیاگیا۔گڈانی کسٹمز نے گزشتہ ایک ہفتے کے دوران اسمگلنگ اور غیر قانونی تجارت کے خلاف اہم کامیابیاں حاصل کرتے ہوئے مجموعی طور پر ایک ارب روپے سے زائد مالیت کی منشیات اور اسمگل شدہ سامان برآمد کیا ہے۔ کھرکھیرا ونڈر چیک پوسٹ پر کارروائی کے دوران ایک کنٹینر سے 188 کلوگرام چرس پکڑی گئی، جس پر ایف آئی آر درج کر لی گئی ہے۔ اسی مقام پر مسافر بس سے 70 ملین روپے مالیت کا اسمگل شدہ سامان بھی ضبط کیا گیا۔مزید کارروائیوں میں چار ریفریجریٹڈ کنٹینرز سے 76 ٹن اسمگل شدہ انار برآمد کیے گئے، جنہیں نیلام کرکے دو کروڑ پچاس لاکھ روپے قومی خزانے میں جمع کرائے گئے۔اورماڑہ اور حب میں کسٹمز حکام نے 24 ہزار لیٹر سے زائد اسمگل شدہ ایرانی تیل اور ڈیزل قبضے میں لے لیا، جب کہ خضدار میں فیلڈ انفورسمنٹ یونٹ نے اسمگل شدہ پوست کے بیج لے جانے والا ہینو ٹرک پکڑ لیا۔ایف بی آر کے مطابق ادارہ اسمگلنگ کے خاتمے، غیر قانونی تجارت کی روک تھام، قومی محصولات میں اضافے اور ملکی معیشت کے تحفظ کے لیے بھرپور اقدامات جاری رکھے ہوئے ہے