سرگودھا: گرفتار ٹیچر کے موبائل سے درجن سے زائد کمسن بچوں کی نازیبا ویڈیوز برآمد

چک 107 جنوبی میں 11 سالہ طالب علم سے مبینہ زیادتی کے الزام میں گرفتار ہونے والے سرکاری اسکول کے ٹیچر صفدر عباس کے موبائل فون سے درجن سے زائد کمسن بچوں کی نازیبا ویڈیوز برآمد ہوئی ہیں۔

پولیس حکام کے مطابق برآمد ہونے والی تمام ویڈیوز کو کیس کے ملکیتی شواہد کا حصہ بنا لیا گیا ہے جبکہ واقعے کی مختلف زوایا سے تفتیش کا دائرہ کار وسیع کر دیا گیا ہے۔ ابتدائی تفتیش سے معلوم ہوا ہے کہ ملزم اس سے قبل بھی متعدد بچوں کو مبینہ طور پر ڈرا دھمکا کر اور بلیک میل کر کے زیادتی کا نشانہ بناتا رہا ہے۔

پولیس حکام نے مزید بتایا کہ اس افسوسناک اور سنگین معاملے میں ملوث دیگر ممکنہ ملزمان اور سہولت کاروں کی گرفتاری کے لیے مختلف مقامات پر چھاپے مارے جا رہے ہیں تاکہ قانون کے مطابق سخت ترین کارروائی عمل میں لائی جا سکے۔