لاڑکانہ: پیٹرول پمپ میں خوفناک آتشزدگی، آئل ٹینکر سمیت متعدد گاڑیاں جل کر راکھ

پیٹرول پمپ پر آئل ٹینکر سے پیٹرول نکالنے کے دوران اچانک بھڑکنے والی ہولناک آگ کے نتیجے میں پیٹرول پمپ سمیت وہاں موجود تمام گاڑیاں جل کر راکھ ہو گئی ہیں۔

ریسکیو حکام کے مطابق آتشزدگی کا یہ حادثہ اس وقت پیش آیا جب آئل ٹینکر سے پیٹرول منتقل کیا جا رہا تھا۔ آگ نے دیکھتے ہی دیکھتے پورے پیٹرول پمپ کو اپنی لپیٹ میں لے لیا، جس کی زد میں آ کر ایک آئل ٹینکر، وین، کار اور 3 موٹر سائیکلاں مکمل طور پر تباہ ہو گئیں۔

واقعے کی اطلاع ملتے ہی 6 سے زائد فائر بریگیڈ کی گاڑیاں اور امدادی ٹیمیں موقع پر پہنچ گئیں اور آگ پر قابو پانے کی کوششیں شروع کر دیں۔ کسی بھی مزید نقصان سے بچنے اور حفاظتی اقدامات کے تحت حکام نے پیٹرول پمپ کے اطراف آنے والی تمام سڑکوں کو مکمل طور پر سیل کر دیا ہے۔