امریکا اور اسرائیل کے انتخابات کے بعد ٹرمپ ایران پر بڑے حملوں کا حکم دے سکتے ہیں، بلومبرگ

امریکی صدر ڈونلڈ ٹرمپ نے ایک بار پھر ایران پر بڑے پیمانے پر حملے کی تیاری شروع کر دی ہے۔ امریکی جریدے ‘بلومبرگ’ نے دعویٰ کیا ہے کہ امریکا اور اسرائیل میں ہونے والے آئندہ انتخابات کے بعد صدر ٹرمپ ایران کے خلاف ان نئے حملوں کا باقاعدہ حکم دے سکتے ہیں۔

بلومبرگ کی رپورٹ کے مطابق صدر ٹرمپ کے حالیہ بیانات سے ظاہر ہوتا ہے کہ مڈٹرم الیکشن سے قبل ایران پر دوبارہ حملوں کا امکان نسبتاً کم ہے۔ اگرچہ ٹرمپ نے ماضی میں دعویٰ کیا تھا کہ مشرق وسطیٰ کی جنگ چند ہفتوں میں ختم ہو جائے گی، تاہم اب حالات جنگ کے مزید شدت اختیار کرنے کی طرف اشارہ کر رہے ہیں۔ امریکا پہلے ہی اپنا تیسرا طیارہ بردار بحری بیڑہ (Aircraft Carrier) اور مزید 10 ہزار میرینز خلیج کی جانب روانہ کر چکا ہے، جبکہ ایرانی جوابی کارروائیوں کا نشانہ بننے والے امریکی فوجی اڈوں سے عملے کی تعداد کو مبینہ طور پر کم کیا جا رہا ہے۔

بروکنگز انسٹی ٹیوٹ کے ماہرین کا کہنا ہے کہ تمام تر اشارے بڑے پیمانے پر دوبارہ فضائی بمباری کی جانب اشارہ کر رہے ہیں۔ دوسری جانب انٹرنیشنل کرائسس گروپ کے ماہر علی واعظ کے مطابق ٹرمپ اور نیتن یاہو دونوں ایران سے جنگ کو اپنی سیاسی مشکلات سے نکلنے کا ذریعہ سمجھ سکتے ہیں، لیکن یہی جنگ ان کے سیاسی مستقبل کے لیے تباہ کن بھی ثابت ہو سکتی ہے۔ واضح رہے کہ اسرائیل میں 27 اکتوبر کو جبکہ امریکا میں 3 نومبر کو مڈٹرم انتخابات منعقد ہو رہے ہیں۔