ایران کے ایٹمی پروگرام کو جنگ کی اصل وجہ بتایا گیا، ایران کے پاس جوہری ہتھیار موجود نہیں تھے: اوباما نے ٹرمپ کا بیانیہ مسترد کردیا

سابق امریکی صدر باراک اوباما نے ایران سے متعلق موجودہ صدر ڈونلڈ ٹرمپ کا بیانیہ مکمل طور پر مسترد کرتے ہوئے کہا ہے کہ ایران کے ایٹمی پروگرام کو جنگ کی اصل وجہ بنا کر پیش کیا گیا، جبکہ حقیقت میں تہران کے پاس کوئی جوہری ہتھیار موجود نہیں تھے۔

خبر رساں ادارے ‘اے ایف پی’ کے مطابق، امریکی ریاست اوہائیو میں ایک بڑی ریلی سے خطاب کرتے ہوئے سابق صدر اوباما نے ٹرمپ انتظامیہ کی پالیسیوں پر شدید تنقید کی۔ انہوں نے کہا کہ موجودہ صدر نے متعدد غلط فیصلے کیے، جن میں سب سے اہم اور خطرہ بننے والا فیصلہ ایک غیر ضروری جنگ کا آغاز تھا جس کا کسی نے مطالبہ نہیں کیا تھا۔

سابق صدر نے ٹرمپ انتظامیہ کو بدترین نااہلی کا نشانہ بناتے ہوئے کہا کہ ایران پر مبینہ فتح کے اعلان کے صرف 7 ماہ بعد ہی ہمارے اہم اتحادیوں اور امریکی فوجی اڈوں پر حملے ہوئے، جن میں امریکی اہلکار ہلاک و زخمی ہوئے جبکہ ہمارے دفاعی میزائلوں کے ذخائر تک ختم ہو کر رہ گئے ہیں۔

ایران جنگ کے سنگین معاشی اثرات کی طرف اشارہ کرتے ہوئے اوباما نے مزید کہا کہ اب ایران کو اس جنگ کی بدولت آبنائے ہرمز پر ایک طرح کا ویٹو حاصل ہو چکا ہے، یہی وجہ ہے کہ عالمی مارکیٹ میں تیل کی قیمتیں مسلسل بڑھ رہی ہیں۔ انہوں نے واضح کیا کہ امریکہ اور دنیا بھر میں اشیائے خورونوش اور دیگر سامان کی قیمتوں میں ہوشربا اضافے کی سب سے بڑی وجہ یہی غیر ضروری جنگ ہے۔