اسحاق ڈار سے چینی سفیر کی ملاقات، خطے میں پائیدار امن کیلئے مذاکرات پر زور

نائب وزیراعظم اور وزیر خارجہ سینیٹر اسحاق ڈار سے چینی سفیر جیانگ زی ڈونگ نے دفتر خارجہ میں ملاقات کی، جس میں پاک چین ہمہ موسمی سٹریٹجک شراکت داری میں پیش رفت اور دوطرفہ تعلقات پر تفصیلی تبادلہ خیال کیا گیا۔ ملاقات کے دوران پاک چین اقتصادی راہداری (سی پیک)، علاقائی رابطوں، تجارت، سرمایہ کاری اور زرعی جدید کاری میں جاری تعاون پر اطمینان کا اظہار کیا گیا۔ اسحاق ڈار نے پاک چین تعلقات کے استحکام کے لیے اعلیٰ سطحی روابط کے تسلسل کو اہم قرار دیا۔ اس موقع پر دونوں رہنماؤں نے ‘نئے دور میں پاک چین مشترکہ مستقبل کی کمیونٹی’ کے عزم کا اعادہ کرتے ہوئے خطے میں پائیدار امن و استحکام کے لیے مذاکرات اور سفارت کاری کی اہمیت پر زور دیا۔