امریکا کی سٹار لنک سروس سے متعلق مختلف ممالک میں مداخلت، رائٹرز کا انکشاف

امریکی حکومت نے گزشتہ چند برسوں کے دوران ایلون مسک کی خلائی کمپنی اسپیس ایکس (SpaceX) سے مختلف ممالک میں ‘اسٹار لنک’ (Starlink) سیٹلائٹ انٹرنیٹ سروس بند یا بحال کرنے کے حوالے سے متعدد درخواستیں کی ہیں، جن کا بنیادی مقصد امریکی خارجہ پالیسی اور فوجی حکمتِ عملی کو تقویت دینا تھا۔

خبر رساں ادارے ‘رائٹرز’ کے مطابق، سابق امریکی حکام نے انکشاف کیا ہے کہ جو بائیڈن کی انتظامیہ نے یمن میں حوثی باغیوں اور لبنان میں حزب اللہ سے منسلک عناصر کی جانب سے اسٹار لنک کے استعمال کو روکنے کے لیے سروس کی بندش کا مطالبہ کیا تھا۔ دوسری جانب، یوکرین کی دفاعی ضرورتوں اور ایران میں حکومتی سنسرشپ کے پیشِ نظر انٹرنیٹ کی رسائی بہتر بنانے کے لیے سروس فعال رکھنے کے اقدامات بھی کیے گئے۔

رپورٹ کے مطابق ٹرمپ انتظامیہ نے بھی 2025ء اور 2026ء کے دوران ایران پر امریکی و اسرائیلی حملوں کے بعد ایلون مسک سے رابطہ کیا، تاکہ ایرانی اپوزیشن اور مظاہرین کو مواصلاتی سہولت فراہم کی جا سکے، تاہم اس سروس کی بحالی کی باضابطہ تصدیق نہیں ہو سکی۔ علاوہ ازیں، حالیہ دنوں میں یوکرین کی ملٹری سیٹلائٹ سروس ‘اسٹار شیلڈ’ (Starshield) کی رفتار اور استعمال پر لگائی جانے والی محدود پابندیوں کے معاملے نے بھی تنازع کھڑا کر دیا ہے، جس کے احکامات مبینہ طور پر وائٹ ہاؤس کے اندر سے جاری کیے گئے تھے۔