شمال مغربی شام میں اسلحہ ڈپو میں دھماکا: 5 افراد ہلاک، 9 زخمی، ادلب میں تباہی پھیل گئی

شمال مغربی شام کے صوبہ ادلب میں اسلحہ کے ایک ڈپو میں زور دار دھماکے کے نتیجے میں پانچ افراد ہلاک اور نو زخمی ہوگئے۔ سیکیورٹی فورسز کے مطابق دھماکا بدھ کے روز قصبے کفرتخاریم میں اس گودام میں ہوا جہاں میزائل اور گولہ بارود موجود تھا۔

سیکیورٹی فورسز کا کہنا ہے کہ دھماکا اُس وقت پیش آیا جب قریب ہی ایک مقام پر کام جاری تھا، اور مرنے والوں میں تمام افراد اسی سائٹ کے ورکرز شامل ہیں۔ ادلب کی سیکیورٹی نے بیان میں واضح کیا کہ ابتدائی تحقیقات سے حادثاتی دھماکے کا تاثر مل رہا ہے۔

شامی سرکاری ٹیلی ویژن نے بھی ہلاکتوں کی یہی تعداد بتائی، تاہم دھماکے کی وجہ بیان نہیں کی۔

سوشل میڈیا پر وائرل ہونے والی تصاویر اور ویڈیوز میں علاقے میں شدید تباہی، آگ، اور اطراف کی زرعی زمین کو پہنچنے والا نقصان واضح دکھائی دیتا ہے۔ بعض مقامات پر شیل اور شریپنل رہائشی عمارتوں اور دکانوں تک جا پہنچا۔

واضح رہے کہ گزشتہ اگست میں بھی ادلب کے مضافات میں اسلحہ ڈپو میں دھماکے سے چار افراد ہلاک ہوئے تھے۔