شاہ غلام قادر، راجہ فاروق حیدر نے بیرسٹر افتخار گیلانی کو وزیراعظم نامزد کرنے کا فیصلہ مسترد کر دیا

مظفر آباد/اسلام آباد: مسلم لیگ (ن) آزاد کشمیر کے صدر شاہ غلام قادر نے پارٹی قائد میاں نواز شریف کی جانب سے بیرسٹر افتخار گیلانی کو آزاد کشمیر کا وزیراعظم نامزد کرنے کا فیصلہ مکمل طور پر مسترد کر دیا ہے۔

پارٹی ذرائع کے مطابق شاہ غلام قادر نے واضح کر دیا ہے کہ وہ ٹیکنوکریٹ کی نشست پر منتخب رکن کو وزیراعظم تسلیم نہیں کریں گے اور نہ ہی نئے قائدِ ایوان کے انتخاب کے لیے بلائے گئے قانون ساز اسمبلی کے اجلاس میں شرکت یا بیرسٹر افتخار گیلانی کو ووٹ دیں گے۔

ذرائع کے مطابق گزشتہ روز اسلام آباد میں وزیراعظم شہباز شریف کی زیر صدارت ہونے والے اجلاس میں بھی شاہ غلام قادر اور سابق وزیراعظم راجہ فاروق حیدر نے اس نامزدگی کی شدید مخالفت کی تھی۔ شاہ غلام قادر کا کہنا تھا کہ وہ قائد میاں نواز شریف کے ’’ووٹ کو عزت دو‘‘ کے بیانیے پر کاربند ہیں اور آزاد کشمیر کے عوام کے سیاسی مینڈیٹ پر کوئی سمجھوتہ نہیں کیا جائے گا۔

آزاد کشمیر مسلم لیگ (ن) کے اندر اس شدید اختلاف کے بعد حکومت سازی کا عمل غیر یقینی صورت حال سے دوچار ہو گیا ہے جبکہ جماعت کے اندر نئی سیاسی صف بندی اور اہم فیصلوں کا امکان ہے۔