وزیرِ اعظم شہباز شریف سے سعودی سفیر نواف بن سعید کی الوداعی ملاقات

اسلام آباد: وزیرِ اعظم شہباز شریف سے پاکستان میں سعودی عرب کے سفیر نواف بن سعید المالکی نے اپنی سفارتی مدت کی تکمیل کے موقع پر الوداعی ملاقات کی ہے۔

ملاقات کے دوران وزیرِ اعظم نے سعودی سفیر کو پاکستان میں ان کی سفارتی ذمہ داریاں کامیابی سے مکمل کرنے پر مبارکباد دی اور پاک-سعودی دوطرفہ تعلقات کے استحکام، معاشی تعاون اور برادرانہ روابط کو فروغ دینے کے لیے ان کی نمایاں خدمات کی تعریف کی۔ شہباز شریف نے خادمِ حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کے لیے اپنی نیک تمناؤں کا اظہار کیا اور خطے میں امن و استحکام کے لیے سعودی عرب کے تعمیری کردار کو سراہا۔

سعودی سفیر نواف بن سعید نے اپنے دورِ سفارت کے دوران ملنے والے بھرپور تعاون پر وزیرِ اعظم اور حکومتِ پاکستان کا شکریہ ادا کرتے ہوئے کہا کہ پاکستان میں ان کا قیام ایک انتہائی یادگار اور خوشگوار تجربہ رہا۔

انہوں نے دونوں برادر اسلامی ممالک کے مابین تعلقات کو مستقبل میں مزید مضبوط اور مستحکم بنانے کے حوالے سے اپنے ذاتی عزم کا اعادہ بھی کیا۔