وزیر داخلہ کا نادرا میگا سینٹر میں پاسپورٹ آفس کی سہولت مہیا کرنے کا اعلان

گوجرانوالہ: وفاقی وزیر داخلہ محسن نقوی نے گوجرانوالہ میں قائم 24/7 نادرا میگا سنٹر کا تفصیلی دورہ کیا اور شہریوں کو سہولیات کی فراہمی مزید بہتر بنانے کے لیے نادرا میگا سنٹر کے اندر پاسپورٹ کاؤنٹر قائم کرنے کا بڑا اعلان کیا۔

دورے کے دوران وزیر داخلہ نے کہا کہ جلد ہی نادرا میگا سنٹر میں پاسپورٹ کے اجرائ اور تجدید کی سہولت بھی فراہم کر دی جائے گی تاکہ شہریوں کو ایک ہی چھت تلے تمام سہولیات میسر آ سکیں۔ انہوں نے نادرا سنٹر میں شناختی کارڈز اور دیگر دستاویزات بنوانے کے لیے آئے شہریوں سے فرداً فرداً ملاقات کی اور شناختی کارڈز کے پراسیس اور سروس کے معیار کے بارے میں دریافت کیا۔ شہریوں نے میگا سنٹر کی سہولیات پر اطمینان کا اظہار کرتے ہوئے بتایا کہ رش کے باوجود اب لمبا انتظار نہیں کرنا پڑتا۔

محسن نقوی نے انفارمیشن ڈیسک اور مختلف کاؤنٹرز کا معائنہ کیا اور ڈیوٹی پر موجود عملے سے بات چیت کی۔ انہوں نے ہدایات جاری کیں کہ سنٹر آنے والے شہریوں کی مکمل رہنمائی کو یقینی بنایا جائے، جبکہ موقع پر موجود بعض شہریوں کی شکایات کا فوری نوٹس لیتے ہوئے ازالے کے احکامات جاری کیے۔

وزیر داخلہ نے بہترین انتظام اور عوامی سروس پر نادرا کے عملے کی کارکردگی کو سراہا اور زور دیا کہ نادرا سنٹرز کا نظام اتنا مؤثر ہونا چاہیے کہ شہریوں کو ایک ہی کام کے لیے بار بار چکر نہ لگانے پڑیں۔