گیس سبسڈی نظام اور قیمتوں کے سلیب پر نظرثانی کی ضرورت ہے، علی پرویز ملک

کراچی: وفاقی وزیر برائے پٹرولیم علی پرویز ملک نے کہا ہے کہ توانائی کے شعبے کی بہتری کے لیے گیس سبسڈی کے موجودہ نظام اور قیمتوں کے سلیب پر نظرثانی کی اشد ضرورت ہے تاکہ تمام صارفین کے لیے منصفانہ اور یکساں نظام قائم کیا جا سکے۔

کراچی میں سوئی سدرن گیس کمپنی لمیٹڈ (SSGC) کے ہیڈکوارٹر میں اعلیٰ سطحی اجلاس کی صدارت کرتے ہوئے وفاقی وزیر نے ادارے کی کارکردگی، آپریشنل امور، اور مالی پائیداری کا تفصیلی جائزہ لیا۔ اجلاس میں ایم ڈی ایس ایس جی سی ایل نے بریفنگ دیتے ہوئے بتایا کہ گیس ڈسٹری بیوشن میں بہتری آئی ہے اور سسٹم کے غیر حساب شدہ گیس (UFG) کے نقصانات میں 57 فیصد کی نمایاں کمی ریکارڈ کی گئی ہے۔ حکام نے بتایا کہ کے-الیکٹرک، صنعتی شعبے اور فرٹیلائزر پلانٹس کو بلا تعطل گیس فراہم کی جا رہی ہے جبکہ گھریلو صارفین کو دن میں تین اوقات گیس دی جا رہی ہے۔

علی پرویز ملک نے کہا کہ گزشتہ ایک سال سے گیس کی قیمتوں میں اضافہ نہیں کیا گیا اور گیس سرکلر ڈیٹ میں اضافے کو روک دیا گیا ہے۔ حکومت عالمی بینک کے تعاون سے گیس سیکٹر میں جامع اصلاحات پر کام کر رہی ہے، جس کے تحت کمزور طبقات کو ٹارگٹڈ سماجی تحفظ کے ذریعے ریلیف دیا جائے گا۔

وفاقی وزیر نے ایس ایس جی سی ایل بورڈ کو ریونیو ریکوری، گیس چوری کے خاتمے اور بلوچستان میں گیس کی فراہمی کے مسائل ترجیحی بنیادوں پر حل کرنے کی ہدایت کی، تاکہ نظام کو مزید شفاف اور مالی طور پر پائیدار بنایا جا سکے۔