ایران نے نئی امریکی پابندیوں کو ریاستی اور معاشی دہشت گردی قرار دے دیا

ایرانی وزیر خارجہ عباس عراقچی نے نئی امریکی پابندیوں کو ریاستی اور معاشی دہشت گردی قرار دیتے ہوئے اقوامِ متحدہ کے سیکرٹری جنرل، سلامتی کونسل اور تمام رکن ممالک کو باضابطہ خط ارسال کر دیا ہے۔ ایرانی میڈیا کے مطابق خط میں موقف اپنایا گیا ہے کہ امریکا جنگی مقاصد میں ناکامی کے بعد اب ایران کے دیگر ممالک کے ساتھ جائز معاشی تعلقات منقطع کرنے کی کوشش کر رہا ہے۔ عباس عراقچی نے نشاندہی کی کہ یہ یکطرفہ پابندیاں شہریوں کی خوراک، ادویات، طبی آلات اور توانائی تک رسائی محدود کر کے بنیادی انسانی حقوق کی سنگین خلاف ورزی کر رہی ہیں۔ تہران نے اقوامِ متحدہ اور عالمی برادری سے مطالبہ کیا ہے کہ وہ ان امریکی پابندیوں کو مسترد کریں اور واشنگٹن کو تیسرے ممالک پر دباؤ ڈالنے سے روکیں۔