پاکستان نے فلسطین میں پائیدار امن کیلئے اسرائیلی قبضے کا خاتمہ ناگزیر قرار دیدیا

اقوامِ متحدہ میں پاکستان کے مستقل مندوب عاصم افتخار احمد نے سلامتی کونسل کے اجلاس سے خطاب کرتے ہوئے کہا ہے کہ فلسطین میں اسرائیلی غیر قانونی آباد کاری بدستور جاری ہے اور نام نہاد جنگ بندی کے باوجود 1200 سے زائد فلسطینی شہید کیے جا چکے ہیں۔ انہوں نے سوال اٹھایا کہ اگر جنگ بندی برقرار ہے تو فلسطینیوں پر حملے کیسے جاری ہیں؟ عاصم افتخار احمد نے زور دیا کہ غیر قانونی آباد کاری، آباد کاروں کے تشدد اور جبری بے دخلی کا فوری خاتمہ اور اسرائیلی جنگی جرائم کی جواب دہی یقینی بنانا انتہائی ضروری ہے۔ انہوں نے واضح کیا کہ پائیدار امن کے لیے اسرائیلی قبضے کا خاتمہ ناگزیر ہے، اور فلسطینی عوام کے حقِ خودارادیت کی جائز جدوجہد میں پاکستان ان کے ساتھ مکمل یکجہتی کے ساتھ کھڑا ہے۔