ایران کا ایک بار پھر حملوں سے متاثرہ جوہری تنصیبات کے معائنے سے انکار

تہران: ایرانی ایٹمی توانائی آرگنائزیشن (AEOI) کے سربراہ محمد اسلامی نے اعلان کیا ہے کہ امریکی اور اسرائیلی حملوں سے متاثر ہونے والی ایرانی جوہری تنصیبات کے معائنے کی اجازت اس وقت تک نہیں دی جائے گی جب تک ان کے لیے نیا اور مخصوص پروٹوکول تیار نہیں کر لیا جاتا۔ میڈیا سے گفتگو کرتے ہوئے محمد اسلامی نے واضح کیا کہ آئی اے ای اے (IAEA) غیر متاثرہ اور محفوظ مقامات پر اپنے معمول کے حفاظتی معائنے جاری رکھ سکتی ہے، لیکن حملوں کا نشانہ بننے والی حساس تنصیبات کے معاملے پر ایران اپنی پارلیمنٹ کے منظور کردہ قانون اور سلامتی کے خدشات پر سختی سے عمل پیرا ہے۔ انہوں نے عالمی ایٹمی توانائی ایجنسی پر شدید تنقید کرتے ہوئے کہا کہ آئی اے ای اے نے ایران کی ایٹمی تنصیبات پر ہونے والے حملوں کی مذمت تک نہیں کی، جس سے اس کی شفافیت، غیر جانبداری اور صلاحیت پر سنگین سوالات اٹھے ہیں۔ محمد اسلامی کا مزید کہنا تھا کہ عالمی ایجنسی کی جانب سے متاثرہ سائٹس تک رسائی کی کوششیں دراصل امریکا اور اسرائیل کی جانب سے حملوں کے نتائج اور نقصان کا تخمینہ لگانے کے لیے ڈالے جانے والے سیاسی دباؤ کا نتیجہ ہیں۔ انہوں نے مطالبہ کیا کہ آئی اے ای اے ایسی سیکیورٹی صورتحال میں معائنے کے طریقہ کار پر اپنا موقف اور پروٹوکول پہلے واضح کرے۔