قومی اسمبلی کی قائمہ کمیٹی نے وفاقی وزیر صحت سے استعفے کا مطالبہ کردیا

اسلام آباد: قومی اسمبلی کی قائمہ کمیٹی برائے صحت نے پمز ہسپتال میں آتشزدگی کے دلخراش واقعے پر شدید غم و غصے کا اظہار کرتے ہوئے وفاقی وزیر صحت مصطفیٰ کمال اور ایگزیکٹو ڈائریکٹر پمز سے فوری استعفے کا مطالبہ کر دیا ہے۔

ڈاکٹر مہیش کمار ملانی کی قیادت میں قائمہ کمیٹی کے ارکان نے پمز ہسپتال کا دورہ کیا اور متاثرہ نرسری کا باریک بینی سے معائنہ کیا۔ میڈیا سے گفتگو کرتے ہوئے ڈاکٹر مہیش کمار نے کہا کہ ہسپتال انتظامیہ اور حکومتی بیانات میں شدید تضاد سامنے آیا ہے۔ انہوں نے نشاندہی کی کہ جہاں ایک طرف پرانے اے سی میں شارٹ سرکٹ کا دعویٰ کیا جا رہا ہے، وہیں دوسری جانب آکسیجن سلنڈر پھٹنے کا خدشہ ظاہر کیا جا رہا ہے، جس سے ظاہر ہوتا ہے کہ انتظامیہ خود اصلی وجہ سے ناواقف ہے۔ انہوں نے انکشاف کیا کہ سی سی ٹی وی فوٹیج کی ابتدائی منتقلی میں بھی اے سی سے آگ بھڑکنے کے کوئی واضح ثبوت نہیں ملے۔

کمیٹی سربراہ نے انتظامی حکمت عملی پر سوال اٹھاتے ہوئے کہا کہ نرسری کی پرانی عمارت 1990 میں تعمیر کی گئی تھی، جبکہ حال ہی میں قائم کیے گئے جدید بلاک میں نرسری منتقل کرنے کے بجائے گائنی وارڈ بنا دیا گیا۔ کمیٹی اس فیصلے کا سخت نوٹس لے گی کہ حساس ترین نوزائیدہ بچوں کو پرانے اور غیر محفوظ بلاک میں کیوں رکھا گیا۔

کمیٹی ممبر ڈاکٹر شازیہ ثوبیہ نے زور دیا کہ متضاد بیانات انتظامی غفلت کا منہ بولتا ثبوت ہیں، لہٰذا اخلاقی ذمہ داری قبول کرتے ہوئے وزیر صحت اور ای ڈی پمز عہدے سے مستعفی ہوں۔ قائمہ کمیٹی نے ماہر ڈاکٹروں پر مشتمل ایک آزاد تحقیقاتی کمیٹی تشکیل دینے اور تمام ذمہ داروں کے احتساب کے لیے ہنگامی اجلاس بلانے کا اعلان کر دیا ہے۔