ادارۂ شماریات کی مہنگائی سے متعلق ہفتہ وار رپورٹ جاری

اسلام آباد: وفاقی ادارہ شماریات کی جانب سے جاری کردہ ہفتہ وار مہنگائی کی رپورٹ کے مطابق، گزشتہ ایک ہفتے کے دوران مجموعی طور پر 15 اشیائے ضروریہ کی قیمتوں میں اضافہ دیکھا گیا ہے۔ رپورٹ میں سب سے تشویشناک پہلو ایل پی جی (LPG) کی قیمت میں 13.28 فیصد کا یکمشت اضافہ ہے، جس سے گھریلو صارفین کے باورچی خانے کے اخراجات مزید بڑھ گئے ہیں۔

خوراک کے شعبے میں انڈوں کی قیمت میں 2.23 فیصد اور مرغی کے گوشت میں 2.13 فیصد اضافہ ہوا ہے۔ اسی طرح دال ماش، مٹن، دودھ، دہی اور بیف کی قیمتیں بھی اوپر گئی ہیں۔ تاہم، عوام کے لیے کچھ ریلیف سبزیوں کی صورت میں سامنے آیا ہے جہاں ٹماٹر کی قیمت میں 6.03 فیصد اور لہسن میں 3.38 فیصد کی کمی واقع ہوئی ہے۔ ماہرین کا کہنا ہے کہ ٹرانسپورٹ کے کرایوں میں 25 فیصد اضافے کے بعد آنے والے ہفتوں میں ان اشیاء کی قیمتوں میں دوبارہ اضافے کا خدشہ ہے۔