لاک ڈاؤن کے نفاذ سے قبل سٹیک ہولڈرز سے مشاورت کریں,ایس ایم تنویر

لاہور: معروف تاجر رہنما اور ایف پی سی سی آئی کے سابق عہدیدار ایس ایم تنویر نے دیگر تاجر رہنماؤں کے ہمراہ پریس کانفرنس کرتے ہوئے حکومت کی جانب سے ممکنہ لاک ڈاؤن اور کاروباری اوقات میں کمی کے فیصلوں کو معیشت کے لیے خودکش قرار دے دیا ہے۔ انہوں نے کہا کہ حالیہ دنوں میں گردش کرنے والے ‘فیک نوٹیفیکیشنز’ نے تاجر برادری میں شدید بے چینی پیدا کی ہے، حکومت کو چاہیے کہ ایسے عناصر کے خلاف فوری ایکشن لے۔

ایس ایم تنویر نے واضح کیا کہ ہفتے میں دو روز کاروبار بند کرنا تاجروں کے ساتھ سراسر ناانصافی ہے، اس اقدام سے پنجاب کے 2 لاکھ سے زائد ریسٹورنٹس اور دیگر انڈسٹریز بری طرح متاثر ہوں گی۔ ان کا کہنا تھا کہ انڈسٹری ایک گھنٹہ بند رہنے سے اربوں روپے کا نقصان ہوتا ہے اور اس طرح معیشت کا پہیہ جام ہو جائے گا۔ انہوں نے سوال اٹھایا کہ رینٹل اور انڈسٹری بند کر کے پیٹرول کی بچت کیسے ممکن ہے؟

تاجر رہنما نے مزید کہا کہ پاکستان اس وقت جنگی جیسی صورتحال میں ہے لیکن ہماری خارجہ پالیسی موثر رہی ہے۔ تاہم، اندرونی طور پر بیوروکریسی معیشت کو نقصان پہنچا رہی ہے۔ انہوں نے مطالبہ کیا کہ رات 10 بجے کاروباری مراکز بند کرنے کا حکم واپس لیا جائے اور پیٹرولیم مصنوعات کی قیمتوں میں اضافے پر نظرِ ثانی کی جائے، ورنہ سرمایہ کار ملک سے بھاگ جائے گا۔ انہوں نے حکومت پر زور دیا کہ کوئی بھی بڑا فیصلہ کرنے سے پہلے اسٹیک ہولڈرز کو لازمی اعتماد میں لیا جائے۔