ہیری پوٹر سیریز کا ٹریلر جاری، کب ریلیز ہوگی؟

مشہورِ زمانہ ‘ہیری پوٹر’ سیریز کے مداحوں کے لیے بڑی خبر سامنے آئی ہے، وارنر برادرز ڈسکوری نے ایچ بی او (HBO) کے تعاون سے نئی ٹی وی سیریز کا پہلا آفیشل ٹیزر جاری کر دیا ہے۔ ‘ایچ بی او میکس یوکے’ کے لانچ ایونٹ کے دوران کیے گئے اس اعلان کے مطابق، یہ ریبوٹ سیریز کرسمس 2026 میں ریلیز کی جائے گی۔

سیریز کا پہلا سیزن ’ہیری پوٹر اینڈ دی فلوسفر اسٹون‘ کے عنوان سے پیش کیا جائے گا، جس میں اصل فلمی سیریز کے مشہور ‘گولڈن ٹرایو’ یعنی ہیری پوٹر، ہرمیون گرینجر اور رون ویسلی کی جگہ بالکل نئے اداکاروں کو متعارف کروایا گیا ہے۔ ٹیزر میں ہیری پوٹر کی اسکول میں مشکل زندگی سے لے کر ‘ہوگ وارٹس’ اسکول آف وچ کرافٹ اینڈ وزرڈری سے آنے والے زندگی بدل دینے والے خط تک کے مناظر دکھائے گئے ہیں۔

کاسٹ کی تفصیلات کے مطابق، ہیری پوٹر کا مرکزی کردار اسکاٹش اداکار ڈومینک میک لاؤگلن ادا کریں گے۔ دیگر اہم اداکاروں میں الیسٹیر اسٹاؤٹ (رون)، اریبیلا اسٹینٹن (ہرماینی)، جان لتھگو (ڈمبلڈور)، جینیٹ میک ٹیئر (میکگونگل) اور پاپا ایسییدو (اسنیپ) شامل ہیں۔ اگرچہ ٹریلر نے جادوئی دنیا کی یادیں تازہ کر دی ہیں، تاہم بعض ناقدین نے ابتدائی ردعمل میں اسے اصل فلمی سیریز کے مقابلے میں کم متاثر کن قرار دیا ہے۔