فضا علی کا عیدالفطر پر اپنی دوسری شادی کا اعلان، تصاویر وائرل

کراچی: نامور پاکستانی اداکارہ اور میزبان فضا علی نے عید الفطر کے پرمسرت موقع پر اپنی دوسری شادی کا باقاعدہ اعلان کر کے مداحوں کو حیران کر دیا ہے۔ فضا علی نے عید کے پہلے روز سوشل میڈیا پلیٹ فارم انسٹاگرام پر اپنی شادی کی تصاویر شیئر کیں، جس میں وہ اپنے شوہر اعجاز خان اور بیٹی فرال کے ہمراہ نظر آ رہی ہیں۔

اداکارہ نے ایک سادہ اور نجی تقریب میں اعجاز خان کے ساتھ نکاح کیا، جس کے بعد انہوں نے اپنی نئی زندگی کے آغاز کی خوشخبری مداحوں کے ساتھ شیئر کی۔ تصاویر میں فضا علی نے سیاہ رنگ کا خوبصورت نیم رسمی لباس زیب تن کر رکھا ہے جس کے ساتھ بھورے رنگ کا کشیدہ کاری والا دوپٹہ اور پھولوں سے سجا ہیڈ پیس ان کی خوبصورتی کو چار چاند لگا رہا ہے۔ دلچسپ بات یہ ہے کہ جوڑے نے مہندی سے ایک دوسرے کے نام بھی ہاتھوں پر لکھوائے ہوئے ہیں۔

اپنے جذبات کا اظہار کرتے ہوئے 41 سالہ فضا علی نے لکھا کہ “اللہ نے انہیں وہ محبت اور خوشی عطا کر دی ہے جس کا انہیں طویل عرصے سے انتظار تھا، اب وہ صرف فضا علی نہیں بلکہ ‘مسز اعجاز’ بھی ہیں”۔ واضح رہے کہ فضا علی کی پہلی شادی 2007 میں فواد فاروق سے ہوئی تھی جن سے ان کی ایک بیٹی فرال ہے، جو اپنی والدہ کی اس نئی شروعات پر ان کے ساتھ موجود تھیں۔