آئی فون صارفین ہوشیار! جدید اسپائی ویئر کا انکشاف

نیویارک/کیف: سائبر سیکیورٹی کے ماہرین نے ایک نئے اور انتہائی خطرناک اسپائی ویئر ‘ڈارکس ورڈ’ (Darksword) کی نشاندہی کی ہے، جو کروڑوں آئی فون صارفین کی ڈیوائسز سے حساس معلومات اور کرپٹو کرنسی والٹس کا ڈیٹا چوری کرنے کی صلاحیت رکھتا ہے۔ حالیہ رپورٹ کے مطابق، اس ہیکنگ ٹول کو یوکرین کی درجنوں ویب سائٹس پر نصب کیا گیا تھا تاکہ وہاں آنے والے صارفین کو نشانہ بنایا جا سکے۔

یہ انکشاف گوگل، موبائل سیکیورٹی فرم ‘آئی ویریفائی’ اور ‘لُک آؤٹ’ (Lookout) کی مشترکہ تحقیق میں سامنے آیا ہے۔ ماہرین کا کہنا ہے کہ رواں ماہ یہ دوسرا موقع ہے جب ایپل کی ڈیوائسز کو نشانہ بنانے والا کوئی بڑا میل ویئر پکڑا گیا ہے۔ اس سے قبل 3 مارچ 2026 کو ‘کورُنا’ (Koruna) نامی ایک اور خطرناک اسپائی ویئر کو بے نقاب کیا گیا تھا۔

تحقیق میں ایک حیران کن تعلق یہ بھی سامنے آیا ہے کہ ‘ڈارکس ورڈ’ اسی سرور پر ہوسٹ کیا گیا تھا جہاں ‘کورُنا’ موجود تھا، جس سے یہ ظاہر ہوتا ہے کہ جدید میل ویئر کی عالمی مارکیٹ تیزی سے پھیل رہی ہے اور ہیکرز اب مزید منظم طریقے سے ایپل کے سیکیورٹی ڈھانچے کو نشانہ بنا رہے ہیں۔ ماہرین نے آئی فون صارفین کو غیر مصدقہ ویب سائٹس اور لنکس سے دور رہنے کی ہدایت کی ہے۔