عمیر جسوال کا دھوکا دینے والوں کیلئے معنی خیز پیغام وائرل

پاکستانی گلوکار اور اداکار عمیر جسوال کی ایک انسٹا اسٹوری سوشل میڈیا پر تیزی سے وائرل ہو رہی ہے جسے صارفین ان کی سابقہ اہلیہ اداکارہ ثنا جاوید کی جانب اشارہ قرار دے رہے ہیں۔

عمیر جسوال ایک باصلاحیت گلوکار، موسیقار اور اداکار ہیں جو اپنی ہمہ جہت صلاحیتوں کے باعث پہچانے جاتے ہیں۔ انہوں نے کوک اسٹوڈیو کے مقبول گانوں ’چرخہ نو لکھا‘ اور ’سمی میری وار‘ کے ذریعے خاصی شہرت حاصل کی، جبکہ اداکاری کے میدان میں وہ ’مور محل‘ اور ’یلغار‘ جیسے منصوبوں میں بھی نظر آ چکے ہیں۔

سال 2020 میں کورونا لاک ڈاؤن کے دوران عمیر جسوال اور اداکارہ ثنا جاوید نے سادہ تقریب میں شادی کی تھی اور بعد ازاں مختلف تقریبات میں ایک ساتھ دکھائی دیتے رہے۔

تاہم جنوری 2024 میں پاکستان کرکٹ ٹیم کے سابق کپتان شعیب ملک اور اداکارہ ثنا جاوید نے اپنی شادی کا اعلان کیا جس نے مداحوں کو حیران کر دیا اور اس کے بعد دونوں شخصیات پر بے وفائی کے الزامات بھی لگائے گئے۔

حال ہی میں عمیر جسوال نے اپنے انسٹاگرام پر بے وفائی کرنے والے ساتھیوں کے بارے میں ایک معنی خیز پیغام شیئر کیا جس میں لکھا تھا کہ اگر کوئی اپنے پارٹنر کے ساتھ دھوکا کرتا ہے تو اسے قبول نہیں کیا جانا چاہیے اور ایسے رویے کو معمول نہیں بنانا چاہیے۔

مداحوں کی بڑی تعداد نے اس پیغام سے اتفاق کرتے ہوئے کہا کہ بے وفائی کسی بھی سطح پر قابلِ قبول نہیں اور ایسے رویے کی کھل کر مذمت ہونی چاہیے۔