فلم انڈسٹری میں اپنی جگہ خود بناؤ، سیف علی خان کا بیٹے کو پیغام

سیف علی خان نے حال ہی میں اپنی بہن سوہا علی خان کے یوٹیوب چینل کو دیے گئے انٹرویو میں اقربا پروری (نیپوٹزم) کے موضوع پر بھی گفتگو کی۔ انہوں نے کہا کہ خوش قسمت اور مضبوط پس منظر رکھنے والے لوگوں اور عام یا کم مواقع رکھنے والے افراد کے درمیان واضح فرق ہوتا ہے، جبکہ عوام ایسے فنکاروں سے زیادہ متاثر ہوتی ہے جو بغیر کسی مضبوط بیک گراؤنڈ کے کامیابی حاصل کرتے ہیں۔

اداکار کا کہنا تھا کہ صرف والدین کی وجہ سے اداکاروں کو بار بار مواقع ملنا درست نہیں، اگر کسی کو موقع ملے اور وہ اچھی کارکردگی دکھائے تو عوام اسے قبول کر لیتی ہے، لیکن بار بار مواقع کے باوجود اچھا کام نہ کرنا غلط ہے۔

سیف علی خان نے کہا کہ وہ اپنے بچوں کی بھرپور حمایت کریں گے لیکن ایک حد تک۔ ان کے مطابق وہ ابراہیم علی خان کو کہتے ہیں کہ وہ ہر وقت ان کے ساتھ نہیں رہ سکتے کیونکہ انہیں پہلے ہی بہت کچھ ملا ہوا ہے، اب انہیں اپنی جگہ خود بنانی ہوگی۔

واضح رہے کہ ابراہیم علی خان نے پروڈیوسر کرن جوہر کی فلم نادانیاں سے فلمی کیریئر کا آغاز کیا تھا، تاہم فلم اور ان کی اداکاری کو زیادہ پذیرائی نہیں ملی جبکہ ان کی دوسری فلم سرزمین بھی باکس آفس پر خاطر خواہ کامیابی حاصل نہ کر سکی۔