ایکس نے واٹس ایپ جیسا نیا میسجنگ فیچر متعارف کرادیا

سماجی رابطوں کے پلیٹ فارم ایکس نے اپنے صارفین کے لیے نیا میسجنگ فیچر ’کن ورس‘ متعارف کرادیا ہے۔

ٹیکنالوجی ماہرین کے مطابق یہ فیچر واٹس ایپ اور سگنل کی طرز کا ہے، کیونکہ اس میں میسج کا ترجمہ، فائل شیئرنگ، اور ایک بار دیکھنے کے بعد پیغام یا ویڈیو غائب ہونے جیسی سہولیات شامل ہیں۔

ایکس کے مطابق نئے فیچر کے ذریعے صارفین اپنے دوستوں کو ٹیکسٹ، آڈیو پیغامات، ویڈیو کالز بھیج سکیں گے اور بھیجے گئے پیغام کو ڈیلیٹ یا ترمیم کرنے کی سہولت بھی حاصل ہوگی۔ صارفین کے تحفظ کے لیے اینڈ ٹو اینڈ انکرپشن اور متعدد پرائیویسی فیچرز بھی شامل کیے گئے ہیں۔

یہ فیچر پہلے مرحلے میں iOS صارفین کے لیے دستیاب ہوگا، جبکہ جلد ہی اینڈرائیڈ صارفین کے لیے بھی جاری کیا جائے گا۔ اس کے علاوہ iOS صارفین کے لیے وائس میمو فیچر بھی متعارف کرایا جائے گا، جس سے مختصر آڈیو پیغامات بھیجنا ممکن ہوگا۔

کمپنی نے خبردار کیا ہے کہ ابتدائی مرحلے میں کچھ صارفین کو معمولی پریشانیوں کا سامنا ہوسکتا ہے، تاہم ان مسائل کو حل کرنے کے لیے سیکیورٹی فیچرز پر کام جاری ہے۔