بچوں کی سلامتی پر سنگین سوالات، چیٹ جی پی ٹی کے خلاف آٹھ امریکی ریاستوں کے مقدمات

مصنوعی ذہانت کی معروف کمپنی اوپن اے آئی (OpenAI) کے خلاف امریکا کی 8 ریاستوں نے الگ الگ عدالتوں سے رجوع کرتے ہوئے الزام عائد کیا ہے کہ اس کا چیٹ بوٹ ‘چیٹ جی پی ٹی’ (ChatGPT) بچوں اور عام صارفین کو شدید نقصان پہنچانے کا سبب بن رہا ہے۔

روئٹرز کے مطابق نیبراسکا، آئیووا، کنساس، ایریزونا، مونٹانا، ویسٹ ورجینیا، آئیڈاہو اور آرکنساس کے اٹارنی جنرلز نے اپنی اپنی ریاستوں کی عدالتوں میں درخواستیں دائر کی ہیں۔ مقدمات میں مؤقف اختیار کیا گیا ہے کہ چیٹ جی پی ٹی کو اس طرح ڈائزائن کیا گیا ہے کہ وہ صارف کے غلط تصورات اور الجھنوں کی تائید کرتا ہے، جس سے خود کو یا دوسروں کو نقصان پہنچانے، حتیٰ کہ اجتماعی فائرنگ (Mass Shooting) جیسے پُرتشدد واقعات کی منصوبہ بندی میں مدد ملتی ہے۔

ریاستوں نے عدالتوں سے مطالبہ کیا ہے کہ اوپن اے آئی کو چیٹ جی پی ٹی کے نظام میں حفاظتی تبدیلیاں کرنے کا پابند بنایا جائے اور ایسے جدید AI ماڈلز کی تیاری اس وقت تک روکی جائے جب تک ان کا طرزِ عمل انسانی اقدار کے مطابق نہ ہو۔ اس کے علاوہ صارفین کے تحفظ کے قوانین کی خلاف ورزی پر کمپنی کے خلاف مالی جرمانے اور ہرجانے کے احکامات جاری کرنے کی بھی استدعا کی گئی ہے۔ امریکی ریاستوں کی جانب سے کسی اے آئی کمپنی کے خلاف یہ اب تک کی سب سے بڑی مشترکہ قانونی کارروائی قرار دی جا رہی ہے۔