حوثیوں کے خلاف آپریشن فجرِ یمن میں 24 گھنٹوں کے دوران 1326 حملے

یمنی مسلح افواج نے دعویٰ کیا ہے کہ ملک میں جاری ’آپریشن ڈان آف یمن‘ کے تحت گزشتہ 24 گھنٹوں کے دوران حوثی باغیوں کے ٹھکانوں پر 1,326 فضائی اور زمینی حملے کیے گئے ہیں، جن کے نتیجے میں تقریباً 370 جنگجو ہلاک یا غیر مؤثر ہو گئے جبکہ درجنوں فوجی گاڑیاں اور عسکری تنصیبات تباہ کر دی گئی ہیں۔ عرب میڈیا کے مطابق مارب اور تعز کے محاذوں پر سرکاری فورسز نے پیش قدمی کرتے ہوئے حوثیوں کے قلعہ بند ٹھکانوں اور سپلائی لائنز کو نشانہ بنایا اور بھاری مقدار میں اسلحہ تحویل میں لے لیا۔ فوجی ترجمان کا کہنا ہے کہ یہ کارروائیاں حوثیوں کی نقل و حرکت محدود کرنے کے لیے کی گئیں، تاہم ان ہلاکتوں اور نقصانات کے اعداد و شمار کی آزادانہ تصدیق نہیں ہو سکی ہے۔