فولڈ ایبل آئی فون کی پری آرڈر بُکنگ آدھے گھنٹے میں ختم!

معروف امریکی ٹیکنالوجی کمپنی ایپل (Apple) کے پہلے فولڈنگ اسمارٹ فون آئی فون ڈوو (iPhone Duo) کی پری آرڈرز بکنگ شروع ہوتے ہی عالمی سطح پر صارفین کا غیر معمولی ہجوم اور زبردست ردِعمل دیکھنے میں آیا ہے۔ بکنگ کا آغاز ہوتے ہی ڈیوائس کی بے تحاشا طلب کے باعث محض 30 منٹ کے اندر ڈیلیوری کا دورانیہ کئی ماہ آگے بڑھ گیا۔

ایپل نے گزشتہ ماہ ایک شاندار تقریب کے دوران اپنا پہلا فولڈ ایبل فون ‘آئی فون ڈوو’ پیش کیا تھا، جسے آئی فون کے 20 سالہ سفر اور ڈیزائن کی تاریخ میں سب سے بڑی اور انقلابی تبدیلی قرار دیا جا رہا ہے۔ کمپنی کے مطابق 16 اکتوبر سے شروع ہونے والے پری آرڈرز کے بعد ابتدائی صارفین کو باقاعدہ ڈیلیوری 23 اکتوبر سے شروع ہونا تھی، تاہم امریکہ اور برطانیہ میں ایپل کے آفیشل آن لائن اسٹورز پر بکنگ شروع ہونے کے آدھے گھنٹے کے اندر ہی نیا آرڈر دینے والے خریداروں کو مطلع کیا گیا کہ اب انہیں اسمارٹ فون کی ڈیلیوری 22 جنوری 2027 تک ہی موصول ہو سکے گی۔

اس بے مثال طلب نے ٹیک انڈسٹری میں تمام سابقہ ریکارڈز کو پچھے چھوڑ دیا ہے، حالانکہ کمپنی نے اسی ایونٹ میں آئی فون 18 پرو اور آئی فون 18 پرو میکس بھی پیش کیے تھے لیکن فولڈنگ فون نے تمام تر توجہ اپنی جانب مبذول کر لی ہے۔ ایپل کی جانب سے آئندہ چند دنوں میں ڈیوائس کی مجموعی سیلز اور عالمی مارکیٹ میں دستیابی سے متعلق مزید تفصیلی اعداد و شمار جاری کیے جانے کا امکان ہے۔