جی میل میں ایک کارآمد فیچر کا اضافہ

گوگل نے ای میل تحریر کرنے کے تجربے کو مزید آسان اور تیز تر بنانے کے لیے اپنی جی میل (Gmail) ایپ میں موجود آرٹی فیشل انٹیلی جنس (AI) فیچر ‘ہیلپ می رائٹ’ (Help Me Write) کے انٹرفیس کو نئے سرے سے ری ڈیزائن کرنے پر کام شروع کر دیا ہے۔

‘اینڈرائیڈ اتھارٹی’ کی ایک تازہ رپورٹ کے مطابق گوگل کی جانب سے جی میل انٹرفیس میں کی جانے والی ان تبدیلیوں کا بنیادی مقصد جیمنائی (Gemini) اے آئی ٹیکنالوجی کے ذریعے ای میلز کے ڈرافٹ تیار کرنے اور انہیں برائے راست ایڈٹ کرنے کے عمل کو بلا تاخیر ممکن بنانا ہے۔ فی الوقت ‘ہیلپ می رائٹ’ کا استعمال مرکزی ای میل کمپوزر سے قدرے الگ تھلگ محسوس ہوتا ہے، جہاں صارفین کو پہلے الگ سے ڈرافٹ جنریٹ کرنا پڑتا ہے اور پھر اس کا جائزہ لے کر اسے کمپوزر ونڈو میں منتقل کرنا ہوتا ہے۔

تاہم نئے ری ڈیزائن کے بعد، جی میل کمپوزر کے بالکل نیچے ایک نیا ‘ڈسکرائب یور میسج’ (Describe Your Message) پرامپٹ باکس شامل کیا جائے گا۔ صارفین کو صرف اپنی درکار ای میل کی مختصر وضاحت یا ہدایات لکھنی ہوں گی، جس کے بعد اے آئی برائے راست ای میل ونڈو/کمپوزر کے اندر ہی ڈرافٹ تیار کر دے گا اور اسے بار بار منتقل کرنے یا الگ سے تیار کرنے کی ضرورت ختم ہو جائے گی۔ رپورٹ کے مطابق یہ فیچر فی الوقت جی میل کی ایک حالیہ اپ ڈیٹ کے کوڈ میں دیکھا گیا ہے اور فی الحال تیاری کے ابتدائی مرحلے میں ہے، جسے عنقریب عام صارفین کے لیے جاری کیا جائے گا۔