متعدد قتل کے مجرم کو 15 سال بعد رہائی کا فائدہ نہیں ملنا چاہیے، پنجاب پروسیکیوشن کا سپریم کورٹ میں موقف

سپریم کورٹ کے 7 رکنی لارجر بینچ کے روبرو ایک سے زائد قتل کے مقدمات میں عمر قید کی سزاؤں کے بیک وقت یا یکے بعد دیگرے نفاذ اور عمر قید کی حقیقی مدت سے متعلق اہم قانونی سوالات پر سماعت جاری ہے۔ اس دوران پنجاب حکومت نے عدالت میں تحریری جواب جمع کراتے ہوئے مؤقف اختیار کیا ہے کہ قتل، اغوا، جنسی زیادتی اور دہشت گردی جیسے سنگین و سفاکانہ جرائم میں سزاؤں کو یکے بعد دیگرے نافذ کرنے کا حکم دیا جانا چاہیے۔ پنجاب پروسیکیوشن کے مطابق معافیوں اور تخفیف کے بعد عملی طور پر عمر قید کی مدت 15 سال رہ جاتی ہے، لہذا متعدد قتل میں ملوث مجرم کو اس بات کا فائدہ نہیں ملنا چاہیے کہ وہ اتنی مدت بعد رہا ہو جائے۔ جواب میں یہ بھی کہا گیا ہے کہ تمام سزاؤں کو ایک ہی مدت میں ضم کرنے سے اضافی جرائم کی سنگینی کم ہو جاتی ہے اور نظامِ انصاف پر عوام کا اعتماد مضبوط کرنے کے لیے ہر جرم کی الگ سزا ہونی چاہیے۔ کیس کی آئندہ سماعت 10 نومبر کو ہوگی۔