جونا گڑھ پر بھارتی قبضے کو 78 برس مکمل، ہندو انتہا پسندی اور جبر کی کہانی آج بھی زندہ

ریاستِ جونا گڑھ پر بھارت کے غیر قانونی اور غاصبانہ قبضے کو 78 سال گزر گئے، مگر ظلم و جبر کی وہ داستان آج بھی تاریخ کے اوراق میں تازہ ہے۔

1947 میں آزادی کے فوراً بعد، جونا گڑھ اسٹیٹ کونسل نے پاکستان سے الحاق کی باقاعدہ منظوری دی تھی، تاہم بھارتی رہنما سردار ولبھ بھائی پٹیل نے نواب آف جونا گڑھ پر فیصلہ واپس لینے کے لیے شدید دباؤ ڈالا۔ ناکامی کے بعد بھارت نے فوجی طاقت کے بل پر ریاست پر قبضہ کر لیا، جو بین الاقوامی قوانین کی صریح خلاف ورزی تھی۔

تاریخی شواہد کے مطابق، بھارتی افواج نے جونا گڑھ میں مسلمانوں پر بدترین مظالم ڈھائے، قتل و غارت، خواتین کی بے حرمتی اور املاک کی تباہی جیسے سنگین جرائم کیے۔ بعد ازاں بھارت نے اپنے قبضے کو جائز قرار دینے کے لیے ایک جعلی ریفرنڈم بھی کروایا، جسے آج تک عالمی برادری نے تسلیم نہیں کیا۔

ماہرین تاریخ کا کہنا ہے کہ جونا گڑھ پر بھارت کا قبضہ دراصل اُس توسیع پسندانہ سوچ کی عکاسی کرتا ہے جس کے تحت نئی دہلی نے کئی دیگر ریاستوں پر بھی زبردستی تسلط قائم کیا۔
آج بھی بھارت میں اقلیتوں پر مظالم، مسلمانوں کے خلاف امتیازی پالیسیاں اور انسانی حقوق کی خلاف ورزیاں اسی جابرانہ سوچ کا تسلسل ہیں جو 78 سال قبل جونا گڑھ میں شروع ہوئی تھی۔