امریکا کا چین سے منسلک بڑا سائبر حملہ ناکام بنانے کا دعویٰ

امریکی محکمہ انصاف نے چین سے منسلک ایک بڑے سائبر حملہ آور نیٹ ورک کو ناکام بنانے کا دعویٰ کرتے ہوئے دو ہیکنگ پلیٹ فارمز کے ڈومینز کو اپنے قبضے میں لے لیا ہے۔ امریکی حکام کے مطابق یہ دونوں سائبر پلیٹ فارمز چین میں قائم ایک کمپنی کے زیرِ انتظام تھے اور ان کے ذریعے ہیکرز امریکی محکمہ انصاف، ناسا اور فیڈرل ریزرو سمیت اہم بنیادی انفراسٹرکچر کو نشانہ بنا رہے تھے۔ رپورٹ کے مطابق یہ ہیکرز 2018ء سے حساس امریکی و عالمی نیٹ ورکس تک رسائی حاصل کرنے کی کوششوں میں مصروف تھے، جبکہ اگست 2019ء میں انہوں نے ناسا کے نیٹ ورک میں داخل ہونے کی ناکام کوشش بھی کی تھی۔ امریکی حکام کا کہنا ہے کہ سائبر حملہ آور انتہائی حساس اداروں کو ہدف بنانے کے لیے جدید اور خطرناک ٹولز کا استعمال کر رہے تھے۔