مریم نواز کا سنکیانگ میں معروف چینی ڈیری کمپنی کے ہیڈکوارٹر کا دورہ

سنکیانگ: وزیراعلیٰ پنجاب مریم نواز شریف نے اپنے دورہٴ چین کے دوران سنکیانگ میں معروف ‘ٹائرن وزڈم ڈیری کمپنی’ کے ہیڈکوارٹر کا دورہ کیا، جہاں کمپنی انتظامیہ اور ماہرین نے ان کا اور پاکستانی وفد کا گرمجوشی سے استقبال کیا۔

وزیراعلیٰ نے ڈیری کے مختلف شعبوں کا دورہ کرتے ہوئے جدید ڈیری فارمنگ، مویشیوں کی افزائش اور ملک پروسیسنگ کے جدید ڈیجیٹل نظام کا باریک بینی سے معائنہ کیا۔ اس موقع پر کمپنی حکام نے وزیراعلیٰ کو دودھ، دہی اور دیگر ڈیری مصنوعات کی تیاری کے جدید مراحل اور حفظانِ صحت کے بین الاقوامی معیار سے متعلق تفصیلی بریفنگ دی۔

وزیراعلیٰ مریم نواز شریف نے گفتگو کرتے ہوئے کہا کہ پنجاب میں لائیو سٹاک کی بہتری، دیہی خواتین کی معاشی خودمختاری اور کٹل فیٹننگ (مویشیوں کی فربہی) کے منصوبے کامیابی سے جاری ہیں۔

انہوں نے اعلان کیا کہ پنجاب حکومت چین کے تعاون اور اشتراک سے صوبے میں جدید ملک اور ڈیری پروسیسنگ پراجیکٹس قائم کرنے کی خواہشمند ہے تاکہ چینی ٹیکنالوجی اور مہارت سے استفادہ کرتے ہوئے پنجاب کے ڈیری اور لائیو سٹاک سیکٹر کو جدید خطوط پر استوار کیا جا سکے۔