ٹی ٹوئنٹی ورلڈ کپ: سیکیورٹی خدشات،بنگلادیش کا بھارت جانے سے انکار، پاکستان کی حمایت حاصل

آئی سی سی ٹی ٹوئنٹی ورلڈ کپ کے لیے بنگلادیش کرکٹ ٹیم کے بھارت نہ جانے کے معاملے پر بنگلادیشی حکومت نے پاکستانی حکومت سے رابطہ کیا ہے۔

حکومتی ذرائع کے مطابق بنگلادیش نے سیکیورٹی خدشات کے باعث بھارت جانے سے انکار کیا ہے، جس پر خطے میں کرکٹ سرگرمیوں کے مستقبل سے متعلق نئی صورتحال پیدا ہو گئی ہے۔

ذرائع کا کہنا ہے کہ اگر بنگلادیش کا مسئلہ حل نہ کیا گیا تو پاکستان بھی ٹی ٹوئنٹی ورلڈ کپ میں شرکت کے فیصلے پر نظرثانی کر سکتا ہے۔

پاکستانی مؤقف کے مطابق بھارت کو کسی ملک کو دھمکانے یا دباؤ میں لانے کی اجازت نہیں دی جا سکتی۔ ذرائع کا کہنا ہے کہ بنگلادیش کے خدشات معقول اور جائز ہیں اور ان پر سنجیدگی سے عمل درآمد ہونا چاہیے۔

حکومتی ذرائع نے بتایا کہ پاکستان نے بنگلادیش کو اس معاملے پر مکمل سفارتی اور اخلاقی حمایت کی یقین دہانی کروائی ہے۔

واضح رہے کہ بنگلادیش پہلے ہی سیکیورٹی وجوہات کی بنا پر ورلڈ کپ کے لیے بھارت نہ جانے کا اعلان کر چکا ہے۔