پنجاب میں بلدیاتی انتخابات، الیکشن میٹریل کی خریداری کے اقدامات شروع

لاہور/اسلام آباد: الیکشن کمیشن آف پاکستان اور حکومتِ پنجاب کے درمیان ہونے والے اعلیٰ سطحی مشاورتی اجلاس کے بعد صوبے میں بلدیاتی انتخابات کے انعقاد کے لیے انتخابی سامان اور میٹریل کی خریداری کا باقاعدہ عمل شروع کر دیا گیا ہے۔

الیکشن کمیشن نے صوبائی الیکشن کمشنر پنجاب کو درکار انتخابی سامان کی خریداری کے لیے باضابطہ اجازت دے دی ہے۔ اس منظوری کے بعد صوبائی الیکشن کمشنر پنجاب عنقریب سامان کی شفاف فراہمی اور خریداری کے لیے ٹینڈر جاری کریں گے، تاکہ تمام تر انتظامات کو وقت سے پہلے حتمی شکل دی جا سکے۔

ذرائع کے مطابق حکومتِ پنجاب نے صوبے میں معطل شدہ بلدیاتی نظام کی بحالی اور نئے بلدیاتی انتخابات کے انعقاد کے حوالے سے اپنی رضامندی کا اظہار کیا تھا، جس کے تحت نومبر اور دسمبر کے دوران تمام تر انتظامی اور تزویراتی مرحلے مکمل کیے جائیں گے۔

الیکشن کمیشن کی جانب سے انتخابی سامان کی بروقت اور پیشگی خریداری کے اس اقدام کو پنجاب میں بلدیاتی انتخابات کے انعقاد میں مزید تاخیر کو روکنے اور آئینی و قانونی تقاضوں کو پورا کرنے کی ایک اہم کوشش قرار دیا جا رہا ہے۔