امریکی پابندیاں اور معاشی دباؤ مشرقِ وسطیٰ کے مسئلے کا حل نہیں: چین

بیجنگ: چین نے امریکہ کی جانب سے ایران پر عائد کی جانے والی یکطرفہ اقتصادی پابندیوں اور معاشی دباؤ کی پالیسی کو یکسر مسترد کرتے ہوئے کہا ہے کہ ایسے اقدامات سے مشرقِ وسطیٰ کے جاری تنازعات کا حل ممکن نہیں ہے۔

بیجنگ میں پریس بریفنگ کے دوران چینی وزارتِ خارجہ کے ترجمان لین جیان نے امریکی صدر ڈونلڈ ٹرمپ کی حالیہ دھمکیوں سے متعلق سوال کا جواب دیتے ہوئے کہا کہ پابندیوں اور زور زبردستی کے حربے تنازعات کو سلجھانے کے بجائے حالات کو مزید پیچیدہ بناتے ہیں۔ انہوں نے تمام متعلقہ فریقوں پر زور دیا کہ وہ ذمہ دارانہ رویہ اختیار کریں اور تمام علاقائی مسائل کو سیاسی و سفارتی ذرائع اور مذاکرات کے ذریعے حل کریں۔

قبل ازیں واشنگٹن کی جانب سے چین سمیت مختلف ممالک پر زور دیا گیا تھا کہ وہ ایران کی معیشت کو تنہا کرنے کی امریکی مہم میں شامل ہوں۔ جب امریکی وزیرِ خزانہ سکاٹ بیسنٹ سے سی این بی سی (CNBC) کے انٹرویو میں بیجنگ پر دباؤ ڈالنے کے حوالے سے پوچھا گیا تو ان کا کہنا تھا کہ حساس سفارتی معاملات پر پسِ پردہ گفتگو بہتر ہوتی ہے، تاہم انہوں نے چین سے اس امریکی مہم میں تعاون کی اپیل کی۔

چینی وزارتِ خارجہ کے ترجمان نے امریکی مطالبات پر ردِعمل دیتے ہوئے واضح کیا کہ چین ایسی تمام غیر قانونی اور یکطرفہ پابندیوں کی شدید مخالفت کرتا ہے جن کی بنیاد بین الاقوامی قانون میں موجود نہ ہو اور جنہیں اقوامِ متحدہ کی سلامتی کونسل (UNSC) کی توثیق حاصل نہ ہو۔ دوسری جانب تہران انتظامیہ نے امریکی معاشی دباؤ کو ‘معاشی دہشت گردی’ قرار دیتے ہوئے اعلان کیا ہے کہ یہ حکمتِ عملی ماضی کی طرح ناکامی سے دوچار ہوگی۔