آئی سی سی نے قذافی سٹیڈیم کے ڈی میرٹ پوائنٹس ختم کردیے

لاہور: انٹرنیشنل کرکٹ کونسل (ICC) نے پاکستان کرکٹ بورڈ (PCB) کی اپیل منظور کرتے ہوئے قذافی سٹیڈیم لاہور کی پچ پر عائد کیا گیا ایک ڈی میرٹ پوائنٹ باضابطہ طور پر منسوخ کر دیا ہے۔

تفصیلات کے مطابق، آسٹریلیا کے خلاف 4 جون کو کھیلے گئے ون ڈے میچ کے بعد میچ ریفری کی جانب سے قذافی سٹیڈیم کی پچ کو ‘غیر تسلی بخش’ قرار دیتے ہوئے ایک ڈی میرٹ پوائنٹ دیا گیا تھا۔ پاکستان کرکٹ بورڈ نے اس فیصلے کو ماننے سے انکار کرتے ہوئے آئی سی سی کے پاس باضابطہ اپیل دائر کی تھی۔

آئی سی سی کے اپیل پینل نے پی سی بی کے موقف اور میچ کے تکنیکی شواہد کا تفصیلی جائزہ لینے کے بعد فیصلہ سنایا۔ اپیل پینل کا کہنا ہے کہ میچ کے دوران پچ پر ایسی کوئی غیر معمولی ناہمواری، غیر متوقع باؤنس یا ضرورت سے زیادہ اسپن دیکھنے میں نہیں آیا جو پچ کو ‘غیر تسلی بخش’ قرار دینے کی بنیاد بن سکے۔

آئی سی سی کی جانب سے ڈی میرٹ پوائنٹ کی منسوخی کے بعد قذافی سٹیڈیم لاہور کی پچ کی ریٹنگ بحال ہو گئی ہے اور اب اس کے کھاتے میں کوئی منفی پوائنٹ موجود نہیں ہے۔