بلوچستان میں 10 انٹیلی جنس بیسڈ آپریشنز کے دوران 37 دہشتگرد ہلاک

کوئٹہ: بلوچستان کے مختلف اضلاع میں سکیورٹی فورسز نے موثر اور کامیاب انٹیلی جنس بیسڈ آپریشنز (IBOs) کے دوران بھارتی سرپرستی میں متحرک کالعدم تنظیم ‘فتنہ الہندوستان’ سے تعلق رکھنے والے 37 دہشت گردوں کو ہلاک کر دیا ہے۔

سکیورٹی ذرائع کے مطابق یہ اہم کارروائیاں صوبے کے حساس اضلاع مستونگ، مچھ، خضدار اور پنجگور میں دہشت گردوں کی موجودگی کی موصولہ اطلاعات پر کی گئیں۔ آپریشنز کے دوران فورسز نے دہشت گردوں کے مضبوط ٹھکانوں اور روپوش گاہوں کو نشانہ بنایا، جس کے نتیجے میں فتنہ الہندوستان کے 37 شرپسند جہنم واصل ہو گئے۔

کارروائیوں کے دوران فورسز نے دہشت گردوں کے قبضے سے بھاری مقدار میں جدید ترین اسلحہ، گولہ بارود، دھماکا خیز مواد سے بھرے ڈرم اور ریموٹ ڈیٹونیشن ڈیوائسز برآمد کر لیں۔ ذرائع کا کہنا ہے کہ برآمد شدہ بارودی مواد اور اسلحہ صوبے میں امن و امان کی صورتحال خراب کرنے اور بڑی تخریب کاری کے لیے استعمال کیا جانا تھا۔

سکیورٹی ذرائع کا مزید کہنا ہے کہ ان اضلاع میں کسی بھی ممکنہ سہولت کار کی موجودگی کا خاتمہ کرنے کے لیے سرچ اور کلیئرنس آپریشنز مسلسل جاری ہیں، اور ملک سے دہشت گردی کے مکمل خاتمے تک عزمِ استحکام کے تحت کارروائیاں بلا تعطل جاری رہیں گی۔