ملائیشین وزیر داخلہ کا نادرا ہیڈکوارٹرز کا دورہ، ڈیجیٹل نظام کو سراہا

اسلام آباد: ملائیشیا کے وزیر داخلہ سیف الدین ناسوتیون بن اسماعیل نے پاکستان کے وزیر مملکت برائے داخلہ طلال چوہدری کے ہمراہ قومی شناختی و اندراج اتھارٹی (نادرا) کے ہیڈکوارٹرز کا دورہ کیا۔

دورے کے دوران چیئرمین نادرا لیفٹیننٹ جنرل محمد منیر افسر نے معزز مہمان کو نادرا کے جدید رجسٹریشن نظام، ڈیجیٹلائزیشن کے عمل اور شہریوں کو سروس ڈیلیوری کی بہتری کے لیے کیے گئے حالیہ اقدامات پر تفصیلی بریفنگ دی۔

ملائیشین وزیر داخلہ نے نادرا کے دورے کو انتہائی خوشگوار اور حوصلہ افزا قرار دیتے ہوئے ادارے میں جدید ترین ٹیکنالوجی کے استعمال اور عوامی سہولیات کی فراہمی کے اقدامات کی کھلے دل سے تعریف کی۔ انہوں نے کہا کہ شہریوں کو تیز رفتار، شفاف اور مؤثر خدمات کی فراہمی کے لیے نادرا کی کاوشیں قابلِ تحسین ہیں اور ادارے کا جدید شناختی نظام پاکستان کی بہترین تکنیکی صلاحیتوں کا منہ بولتا ثبوت ہے۔

ملائیشین وزیر داخلہ اور ان کے ہمراہ آئے اعلیٰ سطحی وفد نے نادرا ہیڈکوارٹرز کے مختلف شعبوں اور ڈیٹا پروسیسنگ سینٹرز کا بھی معائنہ کیا اور آپریشنل امور کا جائزہ لیا۔ اس موقع پر دونوں ممالک کے درمیان شناختی ڈیٹا کے تحفظ اور ڈیجیٹل گورننس کے شعبوں میں باہمی تعاون کو فروغ دینے پر بھی گفتگو ہوئی۔