ٹی ٹوئنٹی ورلڈ کپ 2026: آئی سی سی رابطے پر بنگلہ دیش کرکٹ بورڈ کی وضاحت

بنگلہ دیش کرکٹ بورڈ (بی سی بی) نے آئی سی سی کی جانب سے ٹی ٹوئنٹی ورلڈ کپ 2026 سے متعلق رابطے پر جاری خبروں کو مسترد کرتے ہوئے وضاحت جاری کر دی ہے۔ بی سی بی نے ایک کرکٹ ویب سائٹ کی اس خبر کی سختی سے تردید کی ہے جس میں دعویٰ کیا گیا تھا کہ آئی سی سی نے بنگلہ دیش کو کسی سطح پر انکار کیا ہے، اور کہا ہے کہ ایسے تمام دعوے مکمل طور پر غلط اور بے بنیاد ہیں۔

بی سی بی کے مطابق کرکٹ بورڈ کو آئی سی سی کی جانب سے باقاعدہ جواب موصول ہوا ہے جس میں ٹورنامنٹ میں بنگلہ دیش ٹیم کی مکمل اور بلا تعطل شرکت کو یقینی بنانے کے عزم کا اعادہ کیا گیا ہے۔ آئی سی سی نے بی سی بی کے ساتھ قریبی تعاون سے کام کرنے کی آمادگی ظاہر کی ہے تاکہ اٹھائے گئے خدشات کا ازالہ کیا جا سکے۔

بی سی بی نے بتایا کہ آئی سی سی نے سیکیورٹی کے تفصیلی انتظامات میں بنگلہ دیش کرکٹ بورڈ کی تجاویز کو خوش دلی سے قبول کرنے اور ان پر غور کرنے کی یقین دہانی بھی کرائی ہے۔ بورڈ کا کہنا ہے کہ وہ آئی سی سی اور متعلقہ ایونٹ حکام کے ساتھ تعمیری اور پیشہ ورانہ انداز میں رابطہ برقرار رکھے گا۔

بنگلہ دیش کرکٹ بورڈ کے مطابق بنگلہ دیش ٹیم کی آئی سی سی مینز ٹی ٹوئنٹی ورلڈ کپ 2026 میں ہموار اور کامیاب شرکت کے لیے آئی سی سی سے مسلسل رابطہ قائم ہے، جبکہ قومی ٹیم کی سلامتی، سیکیورٹی اور فلاح و بہبود بورڈ کی اولین ترجیح ہے۔