ملک بھر میں غیر قانونی کال سینٹرز کے خلاف گرینڈ آپریشن کا فیصلہ

اسلام آباد: پاکستان میں غیر ملکی شہریوں کی جانب سے سائبر فراڈ اور فحش مواد کا عالمی نیٹ ورک چلائے جانے کے سنگین انکشافات کے بعد وفاقی حکومت نے ملک بھر میں غیر قانونی کال سینٹرز کے خلاف کریک ڈاؤن کے لیے گرینڈ آپریشن کا حتمی فیصلہ کر لیا ہے۔ ذرائع کے مطابق، وفاقی حکومت نے اس سلسلے میں ایک اعلا سطحی مشترکہ ٹاسک فورس قائم کر دی ہے، جو فیڈرل انویسٹی گیشن ایجنسی (FIA) کے ہیڈ کوارٹر کے براہِ راست ماتحت کام کرے گی۔ اس ٹاسک فورس میں حساس اداروں، نیشنل سائبر کرائم انویسٹی گیشن ایجنسی (NCCIA)، وفاقی پولیس اور متعلقہ اضلاع کی انتظامیہ کے نمائندے شامل ہوں گے۔ ٹاسک فورس کی جانب سے غیر قانونی کال سینٹرز اور سائبر کرائم نیٹ ورکس کے خلاف کی جانے والی تمام تر عملی کارروائیوں کی روزانہ کی بنیاد پر رپورٹ وزارتِ داخلہ کو ارسال کی جائے گی۔ ذرائع نے انکشاف کیا ہے کہ یہ خصوصی ٹاسک فورس آن لائن بھتہ خوری، بلیک میلنگ، غیر قانونی آن لائن گیمبلنگ (Gambling) اور ڈیجیٹل اسکیمنگ کی سخت تحقیقات کرے گی۔ حکومت نے تجارتی مرکز کراچی میں کام کرنے والے تمام مشکوک اور غیر قانونی کال سینٹرز کی تفصیلی فہرستیں بھی مرتب کر لی ہیں، جبکہ تمام صوبائی و وفاقی اداروں کو ٹاسک فورس کے ساتھ مکمل تعاون اور مشترکہ کارروائیوں کی ہدایات جاری کر دی گئی ہیں۔ یہ سخت ترین اقدامات اس اہم پیشرفت کے بعد سامنے آئے ہیں جس میں گزشتہ دنوں اسلام آباد کے علاقے گلبرگ گرینز میں ایک غیر قانونی کال سینٹر پر چھاپہ مار کر 284 غیر ملکی شہریوں کو گرفتار کیا گیا تھا۔ تحقیقات کے مطابق یہ نیٹ ورک خواتین کے جعلی پروفائلز اور آن لائن ٹاسک اسکمز کے ذریعے شہریوں کو دھوکہ دینے کے ساتھ ساتھ فحش مواد کی تیاری اور مالی فراڈ میں ملوث تھا۔