واٹس ایپ کی صارفین کیلئے پرائیویسی فیچر متعارف کرانے کی تیاری

دنیا کی مقبول ترین میسجنگ ایپ واٹس ایپ نے اپنے صارفین کی رازداری کو مزید مؤثر بنانے کے لیے ایک نئے پرائیویسی فیچر پر کام شروع کر دیا ہے، جس کی مدد سے صارفین خود یہ طے کر سکیں گے کہ کون ان کا فون نمبر دیکھ سکتا ہے۔ ٹیکنالوجی رپورٹس کے مطابق اینڈرائیڈ ڈیوائسز کے لیے واٹس ایپ کے تازہ ترین بیٹا ورژن میں سامنے آنے والے اس فیچر کے تحت صارفین کو چار آپشنز—ایوری ون (Everyone)، مائی کانٹیکٹس (My Contacts)، مائی کانٹیکٹس ایکسیپٹ (My Contacts Except) اور نو باڈی (Nobody)—فراہم کیے جائیں گے۔ یہ سہولت ان صارفین کے لیے دستیاب ہوگی جو یوزر نیم استعمال کریں گے، جس سے اجنبی افراد سے چیٹ یا کالز کے دوران فون نمبر مکمل طور پر خفیہ رہے گا۔ تاہم، اگر کسی کے پاس پہلے سے فون نمبر محفوظ ہے تو اسے یہ ظاہر ہوتا رہے گا۔ یہ فیچر فی الوقت تیاری کے مراحل میں ہے اور جلد تمام صارفین کے لیے پیش کیا جائے گا۔